Ethsat.com: በጋምቤላ ከፍተኛ ውጥረት እንዳለ ተሰማ

From: Berhane Habtemariam <Berhane.Habtemariam_at_gmx.de_at_dehai.org>
Date: Mon, 14 Apr 2014 22:11:42 +0200

በጋምቤላ ከፍተኛ ውጥረት እንዳለ ተሰማ

April 14, 2014

ሚያዚያ ፮ (ስድስት) ቀን ፳፻፮ ዓ/ም ኢሳት ዜና :-በስፍራው የሚገኘው የኢሳት ተባባሪ ዘጋቢ እንደገለጸው ካለፈው ሳምንት ጀምሮ በክልሉ ያለው ውጥረት ጨምሮአል።

የኢትዮጵያ መንገዶች ባለስልጣን እየሰራ ባለው የዋንኬ መንገድ አካባቢ ከደቡብ ሱዳን የተፈናቀሉ ስደተኞች በሰፈሩ አካባቢ አንድ ሾፌር እና አንድ የልዩ ፖሊስ አባል መገደላቸውን ተከትሎ አካባቢው በፌደራል ፖሊስ መወረሩ ታውቋል፡፡ የግድያው መንስኤ በውል ባይታወቅም የክልሉ ፖሊስ ከኤርትራ ሰርገው የገቡ አሸባሪዎች የፈጸሙት ነው እያለ ነው።

ፉኝዶ እየተባለ በሚጠራው አካባቢ ደግሞ አንድ ሹፌርና አንድ ማንነቱ በውል ያልታወቀ ባለስልጣን የተገደሉ ሲሆን፣ የገዳዩ ማንነት በውል አይታወቅም። በጋምቤላ ከተማ ደግሞ ከቀናት በፊት በተደረገው የተኩስ ልውውጥ አንድ የፌደራል ፖሊስ አባል ተገድሏል።

ትናንት የመከላከያ ሰራዊት አባላትና ልዩ ሃይል የሚባሉት ታጣቂዎች ደቡብ ሱዳን ድንበር አካባቢ ሄደው ሰፍረዋል። ጋምቤላ ከቅርብ ጊዜ ወዲህ መረጋጋት አይታይበትም የሚለው ዘጋቢያችን፣ የተኩስ ድምጽም አልፎ አልፎ እየተሰማ መሆኑን ተናግሯል።

በርካታ የደቡብ ሱዳን ስደተኞች ወደ ጋምቤላ ክልል እየገቡ መሆኑ ይታወቃል። የቀድሞው የጋምቤላ ክልል ፕሬዝዳንት ደቡብ ሱዳን ውስጥ ከታሰረ በሁዋላ ለኢትዮጵያ ተላልፎ መሰጠቱም ይታወቃል። የክልሉን ፖሊስ ለማነጋገር ያደረግነው ጥረት በኔትወርክ ችግር የተነሳ ሊሳካልን አልቻለም።

*****************************************************************************


በአፋር በተነሳ የጎሳ ግጭት ሰዎች ተገደሉ


ሚያዚያ ፮ (ስድስት) ቀን ፳፻፮ ዓ/ም ኢሳት ዜና :-ሃዊያ እየተባሉ በሚጠሩ የሶማሌ ጎሳዎችና በአፋሮች መካከል በተነሳ የእርስ በርስ ግጭት 6 ሰዎች መሞታቸውን በርካቶች መቁሰላቸውን የአካባቢው ነዋሪዎች ለኢሳት ገልጸዋል።

የጠቡ መነሻ ከግጦሽ መሬት ጋር የተያያዘ ነው የሚሉት ነዋሪዎች፣ ግጭቱ ከትናንት ጀምሮ የቆመ ቢሆን ውጥረቱ ግን አሁንም እንዳለ ነው ብለዋል።

ይህ በእንዲህ እንዳለ ለትንዳሆ የሸንኮራ ምርት ማስፋፊያ በሚል ምክንያት ከመኖሪያ ቀያቸው ተነስተው መንግስት ወደ አዘጋጀላቸው የሰፈራ ጣቢያ ለመግባት ፈቃደኛ ያልሆኑ አንድ የጎሳ መሪና 6 ተከታዮቻቸው መታሰራቸው ታውቋል። ሰዎቹ የታሰሩት የዱብቲ ወረዳ አስተዳዳሪን አስደብድባችሁዋል በሚል ምክንያት ሲሆን፣ ጉዳዩን በቅርብ የሚከታተሉ ወገኖች በበኩላቸው የደብዳቢው ማንነት ሳይታወቅ ነዋሪዎች በጅምላ ማሰሩ አግባብ አይደለም ይላሉ። አስተዳዳሪው ማንነታቸው ባልታወቁ ሰዎች የተደበደቡት ነዋሪዎች አካባቢያቸውን ለቀው እንዲወጡ እየዞሩ ትእዛዝ በሚሰጡበት ወቅት ነው።

በብዙ መቶ ሺዎች የሚቆጠሩ አፋሮች ቀያቸውን ለቀው እንዲወጡ መታዘዛቸውን ኢሳት ያነጋገራቸው ሰዎች የገለጹ ሲሆን፣ ለሰፈራ ተብሎ የተዘጋጀው ቦታ ደግሞ ለኑሮ የማይስማማ ቦታ መሆኑን አክለው ተናግረዋል።

የአፋር ሰብአዊ መብቶች ሊቀመንበር አቶ ገአዝ አህመድ ህዝቡን ለማፈናቀል እንቅስቃሴ መጀመሩን በተመለከተ መረጃ እንደደረሳቸው ገልጸዋል።

መንግስት ህዝቡን ሲያፈናቅል ውሃ ምግብና ሌሎች መሰረታዊ ፍጆታዎችን ሳያዘጋጅ የሚያደርገው ማፈናቀል ከዘር ማጥፋት ወንጀል ተለይቶ አይታይም የሚሉት አቶ ጋአዝ የሚመለከታቸው ወገኖች ሁሉ ለጉዳዩ ትኩረት እንዲሰጡበት አሳስበዋል።

 

Received on Mon Apr 14 2014 - 16:12:08 EDT