Dehai

ሰብኣይ የምጽኣልኪ ጡጥ ቁኒን 
ፈትልኪ ፈታትልኪ ተብልዮ ክድን።

ሰብኣይ የምጽኣልኪ ቆርበት ንገዛ 
ኣልፍዕኪ ትሰርሕዮ ማሓዘል ኣጎዛ።

ሰብኣይ የምጽኣልኪ መዓር
ሜስ ተስትይዮ ነዚ ሰካር።

ሰብኣይ የምጽኣልኪ ቀሸም ዕንጨይቲ
ኣጒድኪ ተሙቁዮ ምሉእ ለይቲ።

ሰብኣይ የምጽኣልኪ ጸባ ላሕሚ 
ኣቃምምኪ ትገብርሉ ጥዑም ጠስሚ።

ሰብኣይ የምጽኣልኪ ጭቃ ጸብሪ
ገንኢ፡ ዕትሮ ትሰርሒ መዕቆሪ።

ሰብኣይ ይሓርደልኪ ደርሆ ጋሕ-ጋሕ
ክሽን ተብልሉ ጥዑም ምሳሕ።

ሰብኣይ የምጽኣልኪ ፈውሲ ሕማም
ግን ንስኺ ተለልዮ ጠንቁ ጉዳም።

ሰብኣይ የምጽኣልኪ ጥረ-ገንዘብ
ቆጥብኪ ትሽምቲ ቀለብ።

በዚ ዝተላዕለ ይብሉኺ ባህሊ ዓቃቢት
ሃይለ ክዝግፍ ንስኺ ተቆናኒት።

ሃይለ ቦኹረ