ኣብ ኢትዮጵያ ንዝተወሰነ ኣዋጅ ህጹጽ እዋን ሓደጋ ብትሪ ከምዝቃወሞ ኤምባሲ ኣመሪካ ኣብ ኢትዮጵያ ኣብ ዘውጽኦ መግለጺ ኣፍሊጡ።

ኤምባሲ ኣመሪካ ኣብ ኢትዮጵያ ኣብ መግለጺኡ: እቲ ኣዋጅ ንዘጠቓልሎ ገደብ መሰረታዊ ናጽነታት መሰል ምእካብን ሓሳባትካ ምግላጽን ተቓዊምዎ ኣሎ። ብመሰረት ሓበሬታ እቲ ካብ ኤምባሲ ኣመሪካ ኣብ ኢትዮጵያ ዝወጸ መግለጺ: ንጎነጽን ምጥፋእ ህይወትን ሻቕሎት መንግስቲ ከምዝካፈል ዝጠቐሰ ክኸውን እንከሎ፤ እቲ ናይዚ ፍታሕ ግን ዝዓበየ ናጽነት ምሃብ እንበር ናጽነት ምቕናስ ከምዘይኮነ ብተወሳኺ ኣብሪሁ።

ኢትዮጵያ ኣጋጢምዎ ዘሎ ብድሆታት ዲሞክራስያዊ ተሃድሶ: ቁጠባዊ ዕብየት ወይድማ ነባሪ ርግኣት ብኣሳታፊ ልዝብን ፖለቲካዊ መስርሕን ክፍታሕ ዝግብኦ ድኣ'ዩምበር ገደብ ብምትግባር ከምዘይኮነ እቲ ካብቲ ኤምባሲ ኣመሪካ ኣብ ኢትዮጵያ ዝወጸ መግለጺ ጠቒሱ።

ኣዋጅ ህጹጽ ሓደጋ ነቲ ኣብዚ ቐረባ ግዜ ዝተረኣየ ኣወንታዊ ስጉምታት ኣብ ጉዳይ ምህናጽ ፖለቲካዊ ሱታፌን ምፍታሕ እሱራትን ዘዳኽም'ዩ ክብል ድማ እቲ መግለጺ ኣፍሊጡ። ። ኢትዮጵያውያን ሓሳባቶም ብሰላማውን ናጻን ኣገባብ ከይገልጹ ገደብ ምግባር ድማ ድምጾም ከምዘይተሰምዐ ምልክት ዝህብ ሓባሪ መልእኽቲ'ዩ ኢሉ።

እቲ መግለጺ ኣብ መወዳእታ መንግስቲ ኢትዮጵያ ንዘመሓላለፎ ኣዋጅ ህጹጽ እዋን ሓደጋ ዳግማይ ክሓስበሉ "ብጽኑዕ ነተሓሳስብ” ከምኡ`ውን፡ ህይወትን ንብረትን ህዝቢ ንምሕላው ካልእ መንገዲ ከላልን፡ ንዘላቒ ደሞክራሲ መንገዲ ዝኸፍት ትርጉም ዘለዎ ፖለቲካዊ ተሳትፎን ልዝብን ከስፍሕን ነተሓሳስብ ክብል ኣብ ኣዲስ ኣበባ ዝርከብ ኢምባሲ ኣመሪካ መግለጺ ኣውጺኡ`ሎ።

--

ቀዳም 17 ለካቲት 2018  ተወልደ ወልደገብረኤል

ሚንስተር ምክልኻል ኣቶ ሲራጅ ፈርጌሳ