Basic

*ዝተረረ ጉዕዞ ብዓወት ዛዚምና፡

ዝተጠጅኡ ሽርሕታት ከምትኪ ኣብኒና፡

ኣብዚ ክንበጽሕ ምሩጻት ከፊልና፡

ስቕ ኣይንብል ጌጋ እናረኤና።

*ኩሉ ዝጽረግ ናይ ርሑቕ ቀረባ ጸራሪግና፡

እታ ዘንጊ ሓቂ ኣብ ዓለም ኣንበልቢልና፡

ፈታዊ ጸላኢ ከምዝፈልጣ ጌርና

ይፈርህ ግን ከይስዕርር ብልሽውና።

*ግዜ መጺኡ ሃገር ንሃንጸሉ፡

ኣሰራርሓ ትካላት ዝፍተሸሉ፡

ብልሽውና ከይስዕርር ንጥንቀቐሉ፡

ብመልሓሱ ዝነበር ተበላጺ ከይህሉ።

*እዚ ህዝቢ ቀዳምነት ሂቢ ስቕ እንተበለ፡

ኣብ ጎድኒ መንግስቱ ኮይኑ እንተተጋደለ፡

ልቢ ኣዕብዩ ግዜ እንተዋህለለ፡

ኣለዎ ዝዓቖሮ ዝበሃል ገለ። 

*ከይህልዉ ዘስቀጡ ተበለጽቲ፡

ዘይረኽቦም ዝመስሎም መንግስቲ፡

ሃነፍነፍ ዝብሉ ቅኑዓት መሰልቲ፡

ፈጺሞም ዝረስዑ ናይ ጀጋኑ መስዋእቲ።

*ኣለዉ ገና ሃገር ክሃንጹ ዘየዕረፉ፡

ኣብ ቤቶም ኮፍ ኢሎም ዘየተንፈሱ፡

ምስ ደቆም ደቂ ደቆም ኣብ ቃልሲ ተሰለፉ፡

ሃገር ብኦም'ዩ ሕማማ ተፈዊሱ።