Dehai News

ሪፖርታጅ:- ሓያል ሰላማዊ ሰልፊ ኤርትራውያን:

ኣብ ዓባይ ብሪጣንያ!!!

ሳሕል ፕረስ!!! ነቲ ኣብ ዓባይ ብሪጣንያ ብማሕበር-ኮም ኤርትራውያን ዓባይ ብሪጣንያ ተወዲቡ ክካየድ ንዝወዓለ: ሰፊሕ ሃገራዊ ኤርትራዊ ሰላማዊ ሰልፊ ኣብ ዓባይ ብሪጣንያ ብኣካል ቀሪቡ ክከታተሎ ዊዒሉ::

በዚ መሰረት ወኪልና ወኪል ሳሕል ፕረስ!!! ዘርኣይ ሰሎሞን ዝለኣኸልና ሪፖርታጅ ናባኹም ናብ ተኸታተልትና ነብሎ ኣለና ሰናይ ምክትታል ንባብ:-

ኤርትራውያን ኣብ ኤውሮጳ ብፍላይ ከኣ ኣብ ዓባይ ብሪጣንያ ብትምህርትን ስራሕን ናይ ስደተኛ ዑቕባነትን ምኽንያት ብምግባር: ካብ 1960 ጀሚሮም ክሳብ እዚ ሒዝናዮ ዘለና ዓመተ 2023 ክቱር ብዝሒ ዘለዎም ኤርትራውያን ዝነብሩ ኮይኖም: ክሳብ ሕጂ ከም ኩሉ ኤርትራዊ ዲያስፖራ ካብ መቦቆላዊ ቛንቛታት ኣዴታቶምን መንነቶምን: ባህላዊ ክብርትታቶምን: ታሪኻዊ ክብሮምን ከየሰናኸሉ: ንዘራኽቦም ሃገራዊ ክብሪ ዓቒቦም ኣብ እዋን ቃልሲ ንነጻነት ነቲ ዝወርድ ዝነበረ ቀዝሕን በረድን: ኣሳሒታን ዝናብን: ቁርን ንፋስን ተጻዊሮም: ነቲ ኣብ'ቲ እዋን ኣብ ልዕሊ ህዝቢ ኤርትራ ንዝፍጸም ዝነበረ ግፍዕን መቕተልትን: ማእሰርትን መርሸንትን: ንሰውራ ኤርትራ ንምድኻምን ንምድምሳስን ዝካየድ ዝነበረ ደብዳብ ነፈርቲ ክላስተር ቦምብን: ቅመማዊ ጋዝን ንምቅዋምን ንሰውረኦም ንምሕጋዝን ምትብባዕን ዝገብርዎ ዝነበሩ ውጺኢት ገንዘብን: ምስ ህዝቦምን ሰውረኦምን ዝነበሮም ዝምድና ኢድን ጓንትን ክሳብ ሎሚ መስርዖም ከይበታተኹ: ንነጻነት ሃገረ ኤርትራ ኣረጋጊጾም:: ሉኡላውነት ኤርትራ ዘውሓሱን ንኹሉ ናይ ገናዞን ገራዞን ሽርሒ በዲሆም: ሃገር ብጽንዓታ ደው ኢላ ከም እትቐውምን ኣትኪላ ክሳዳ ኣቕኒዓ ኣብ መጋባእያታት ዓለም: ነተን ሓያላት ዓለም ኢና ዝብላ ዝነበራ ርእሰን ዘድነና ዓበይቲ ሃገራት ኣቃሊዑ ብርከን ዘድከመ ህዝቢ ኤርትራ ኢዩ:: ሎሚ ዓርቢ ዕለት 22 መስከረም 2023: ኣብ ማእከል ዓባይ ብሪጣንያ ከተማ ሎንዶን ዳውንታውን ስትሪት ዓለም ዘናወጸ ሰላማዊ ሰልፊ ክካየድ ዊዒሉ::

ኩሉ ኤርትራዊ ሃገራዊ ነባሪ ዓባይ ብሪጣንያ ንዓርቢ 22 መስከረም 2023: ኣብ ከተማ ሎንዶን ዳውኒንግ ስትሪት ዓቢ ሰላማዊ ሰልፊ ከም ዝካየድ: ብመንገዲ ኤምባሲ ሜድያ ሎንዶን ተቓሊሑ ናብ ኩለን ኤርትራውያን ማሕበራዊ ሜድያታት ተመሓላሊፉ ናብ መላእ ዓለም ምስ ተጋውሐ: ኩሉ ካብ ዝነበሮ ቅዛነት ተበራቢሩ: እታ ግዜ ሎሚ ዘይኮነ ሕጂ ኢዩ ብማለት: ኩሉ ናብ ስራሕ ዝዋፈር ካብ ስርሑ ፍቓድ ክወስድ: ኣሸበሸብ ኣብ'ታ መዓልቲ ሰላማዊ ሰልፊ ናይ ሕክምና ቆጸራ ዝነበሮ ቆጸርኡ ከመሓላልፍ: ኣብ ርሱን ናይ ምንቅስቓስ ሰሙን ኢዩ ኣሕሊፍዎ::

''መዓልትን ከልብን ከይጸዋዕካዮም ደበኽ ይብሉ'' ከም ዝብሃል: መዓልቲ ዓርቢ 22 መስከረም ምስ ኣኸለት ብመሰረት ኣሰናዳኢት ሽማግለ ብዝመደበቶ ግዜ ሰሌዳ ሰላማዊ ሰልፊ ዝጅመረሉ ካብ ሰዓት 13:00 ድሕሪ ቐትሪ: ክሳብ ሰዓት 18:00 ናይ ምሸት ብናይ ሎንዶን ኣቖጻጽራ ተባሂሉ መደብ ዝተሰርዔ ብምንባሩ: መላእ ዓባይ ብሪጣንያ ካብ ወጋሕታ ሰዓት 06:00 ሃገረ ዓባይ ብሪጣንያ ብናይ ኤርትራ ትእምርቲ ጽንዓትን: ሉኡላዊ ነጻነትን ሓርነትን ዝኾነት: ኣብ'ታ ዋላ ንኻሊኢት 'ውን ትኹን እንኮ! ሻዕ ምስ ተሰቕለት ዘይትደንን ዘንጊ ሉኡላዊ ሃገራዊ ሓርነት ኤርትራ ዝኣወጀት ዘይትክማህ ባንዴራ ሉኡላዊት ኤርትራ እንዳንበልበሉ: ባንዴራ ኤርትራ ብዝወቀባን ዘንበልብላን ናይ ውልቂ መካይንን ኣውቶቡሳትን: ብሞተር ሳይክል ተዓጂቦም ገለን ከኣ ብባቡራት ተሳፊሮም: ናይ ዝተፈላለዩ ደረፍቲ መንደላይ! ስሚ ቲክ-ቶክ ማሕበራዊ መድያ: ኩራዕ ኤርትራዊ! ኣይንዛነን! ስመር! ሰራዊት ዝና: ብትግሬ ተላይ መሰንቆ! ወለት ዓጄ! እምበር ወጠን እምበር ምድርር ዪኒነብር ንሕና ዪኒነብር! ዝብል ዝተፈላለየ ሙዚቃ እንዳተጻወቱ ብመግልሒ ድምጺ ገይሮም ናብ ግዳም እንዳኣቃልሑ: ጾታ ደረጃ ከይፈለዩ: ኣዴታት ደቀን ሒዘን ወቂበን ኣቦታት ንደቆም ኣምሪሖም: መንእሰያት ኣብ ልቦም ነታ ካብ ሰማእታቶምን ዓበይቲ ወለዶምን ኣያታቶምን ንዝተረከብዋ ሃገሮም ብውሽጢ ልቦም እንዳሰላሰሉ: ኣጆኻ ህዝበይ! ኣነ እንከለኹ ዝትንክየኩም የለን! ዝብል ውሽጣዊ ልባዊ ጭርሖ ቃል-ኪዳን እንዳተኣሳሰሩ: ብብሩህ ገጾም ብዕቱብ መንፈሶም ነበርቲ ማንችስተር ብብሩህ ገጾም: ምስ ዕታር ናይ ጽንዓትን ዓወትን ዕንባባ: በርኒንግሃም ምስ ኖቲንግሃም: ዝናሮም ባንዴራ ተጎልቢቦም:: ሰብ ሊዲስ ሃየ ተወደብ እንዳበሉ: ኩልኻ ንዓ ሕጂ ገስግስ:: ኣናብስ ሸትፊልድ: ንበገስ ሕጂ ጸላእቲ ከነርዕድ:: ሰብ ኒውካስትል ሓቢሮም ምስ ሊቨርፑል: ድምጾም ሰሚዑ ጸላኢ ኢሉ ዑኽልል ጥቕልል:: ካብንትሬት ተተሓሒዞም ምስ ሌፍተር ስዒቦም ካርዲፍ: ካብዞም ጀጋኑ ኣብ ቅድሚኦም ሞ መንዩ ከዕዘፍዝፍ:: ሰብ ሜዲልስፓራ ግላስኮው ዌክፈልት ስቶክ: ቅርብ እንዶ ይበል ጸላኢ ክሳዱ ክብተኽ:: ኢሎም ብጠቕላላ ካብ 4ተ ዞባታት ከተማ ሎንዶን ብባንዴራታት ወቂቦም ምስ ኩሉ ዝተቐረበ ነቲ እዋን ዘገልግል ጭርሖታት:- ''መሰልን ባህልን ክብርን ኤርትራውያን ይተሓሎ!!!'' ''መንግስቲ ኢንግላንድ ኤርትራዊ ክብርታት ከኽብር ግዴታ ኣለዎ!!!'' ወ.ዘ.ተ... ዝብሉ ጭርሖታት ሒዞም: ናብ ቀንዲ መተኣኻኸቢ ነቕጣ ኣብ ቅድሚ ቀጽሪ ቤት ጽሕፈት ቀዳማይ ሚኒስተር ዓባይ ብሪጣንያ ዳውኒንግ ስትሪት ኣስታት 3.500 (ሰለስተ ሽሕን ሓሙሽተ ሚእትን) ብጉዳይ ሃገሮም ዝነደሩ ኤርትራውያን ሃገራውያን ተኣኻኺቦም::

ኩሉ ሰልፈኛ በቲ ኣወሃሃዲት ሽማግለ ዝሃበቶ ናይ ሕጊ ቀጥዒ ተቐይዱ ጭርሖታቱ ምስ ኣቃልሐ: ብመሰረት ዝተታሕዘ መደብ ኣወሃሃዲ መደብ ሓጺር መእተዊ ናይ እንቋዕ ብደሓን መጻእኩም ዝብል መደረ ምስ ኣስምዔ: መድርኽ ንኣቦ ወንበር ሃገራዊ ሽማግለ ኤርትራውያን ኣብ ዓባይ ብሪጣንያ ኣቶ ኣሕመድ መሓመድ ምስ ኣረከቦ: ኣቶ ኣሕመድ መሓመድ ንዝተሰርዔ መደባት ናይ'ታ መዓልቲ ዝርዝር ሓበሬታ ብምቕራብ:- ''ስለምንታይ ኢና ሰልፊ ንገብር ዘለና?'' ሕቶ ዘቕረበ ኣቦ ወንበር ሃገራዊ ሽማግለ ኤርትራውያን ኣብ ዓባይ ብሪጣንያ ኣቶ ኣሕመድ መሓመድን ''ሕና ሰልፊ ንገብር ዘለና:-

1. ምሕላው ባህላዊ ቅርስታትና ነቲ ሃብታም ኤርትራዊ ባህላዊ ውርሻና: ካብቶም ክዘርግዎን ከዳኽምዎን ዝደልዩ ተጻባእቲ ሃገረ ኤርትራ ንምሕላው ደው ኢልና ኣለና!!! ባህልና ምንጪ ሓበንን ሓድነትን ጥምረትን ኣብ ውሽጢ ሕብረተ-ሰብና ስለ ዝኾነ'' ዝበለ:- ኣቶ ኣሕመድ ቀጺሉ:-

2. ምርግጋጽ ድሕንነት ንኹሉ ልክዕ ከም ኩሉ ነባሪ ዓባይ ብሪጣንያ ከተማ ለንደን: ኣብ ጎደናታት እዛ ከተማ ውሕስነት ክስምዓና ይግባእ:: ኣብ ልዕሊ ሕብረተ-ሰብና ዝፍጸም ምፍርራሕ ምግፋዕ ዓመጽን ጎንጽን ኣይንጻወሮን ኢና::

3. ናይ ምጽንባልን ፈስቲቫል ናይ ምክያድን በዓላት ናይ ምባልን መሰልና ምኽባር: ምምሕዳራት ከባቢና ብዘይ ፍርሒ ምዝንባዕን ምስራዝን ባህልና: ብበዓላት ፍጻሜታትን ምትእኽኻባትን ናይ ምጽንባል መሰልና ከም ናይ ኩሉ ማሕበረ-ሰባት ዓባይ ብሪጣንያ ዘለው ኮሙኒቲ: መሰልና ከኽብሩ ንምዝክኻርን ናይ መሰልና ምዃኑ ጽዕንቶ ምፍጣርን::

4. ገበናዊ ባህሪ ምንጻግ ነቲ ጸገም ከም ተራ ውሽጣዊ ባእሲ ወይ ፖለቲካዊ ንሕንሕ ንምምዳብ ዝግበር ዝኾነ ይኹን ፈተነ: ብትሪ ንነጽጎ!!! ኣብ እዋን ባህላዊ ፍጻሜታትና ንሕብረተ-ሰብና ንምሽባርን ምህዋኽን ዝዓለመ: ገበናዊ ተግባራት ግዳያት ናይ ምግባርና መስርሕ ብትሪ ንኹንኖ ኢና::

5. ምክልኻል ድሕነት ህላዌ ውሕስነት ህጻናት ደቅናን ኣረጋውያን ሽማግለታት ወለድናን: ደቂ ኣንስትዮ ኣሓትናን ኣዴታትናን ምርግጋጽን: ህጻናት ደቅና ኣብ መናፈሻታትን መዘናግዒ ቦታታት ነጻ ኾይኖም ናይ ምጽዋትን ምዝንጋዕን መሰሎም ክረጋገጽን: ምስ ክብርታትን ባህላዊ ምዝናቕ ዓባይ ብሪጣንያ ተነባቢሮም ክዓብዩን: ካብ ምሽቕራርን ፍርሕን ወጺኦም ብነጻነት ናይ ምንቅስቓሶም መሰል ተሓልዩ:: ኣካል ናይ'ቲ ንጡፍን ንኹሉ ዝሓቁፍን ሕብረተ-ሰብ ዓባይ ብሪጣንያ ንክኾኑ መሰል ኣለዎም:: ኣረጋውያንና ብዘይ ፍርሒ ካብን ናብን ጎደናታት ዓባይ ብሪጣንያ ብነጻነትን ሓርነትን ክዛወሩ ዘይሕከኽ መሰሎም ኢዩ:: ካብ ነዚ ዝሕርምዎም ዘለው ኸተርትን ዓመጽትን ነጻ ንምዃኖም: መንግስቲ ዓባይ ብሪጣንያን ሓይልታት ጸጥታ ኣኽበርቲ ሕጊ ፖሊስ ግበኦም ክዋጽኡ ናይ ምሕላውን ምክልኻልን ሓላፍነቶም ክወስዱ ግዴታ ኣለዎም::

ባህግና ኤርትራዊ ውርሻና እናኽበርና ኣብ ሕብረተ-ሰብና ኣወንታዊ ኣበርክቶ ዝገብሩ ንጡፋት ሕጊ ዝኽተሉ ዜጋታት ዓባይ ብሪጣንያ ክኾኑ ንብህግ:: ደቅና ኣብ ውሑስን ንኹሉ ዝሓቁፍን ሕብረተ-ሰብ ዓባይ ብሪጣንያን ከተማ ሎንደንን ክዓብዩ ንትምነን ንጽዕርን:: ባህላዊ ብዙሕነትን ሓባራዊ ሰላምን ዝኽበረሉን ዝነግሰሉን 'ምበር: ኣብ ሓደጋ ዘይንወድቀሉ ብፍቕሩን ምትሕቑቛፉን ኣብ ዝዓበናሉ ናይ ሃገርና ባህላዊ ምክብባርን ምክእኣልን ዓሲልና: ኣብ ውሽጢ'ቲ ሞዛይክ ዝኾነ ሕብረተ-ሰብ ዓባይ ብሪጣንያ ተወሃሂድና ናይ ምኻድ መሰልና ንኽሕለወልና ኢና ሰላማዊ ሰልፊ ነካይድ ዘለና ዝበለ: ኣቦ ወንበር ሽማግለ ሃገራዊ ኤርትራ ኣብ ዓባይ ብሪጣንያ ኣቶ ኣሕመድ ማሕሙድ መደረኡ ደምዲሙ::

ብድሕሪ'ዚ ኣቦ ወንበር ሽማግለ ሃገራዊ ኤርትራ ኣብ ዓባይ ብሪጣንያ ኣቶ ኣሕመድ ማሕሙድ ዝመርሖ ጉጅለ: ናይ ህዝቢ መልእኽቲ ሒዙ ናብ ቤት ጽሕፈት ቀዳማይ ሚኒስተር ዓባይ ብሪጣንያ ሪሺ ሱናክ ደብዳቤ ድሕሪ ምብጽሑ: ምስ ዝምልከቶም ላዕለዎት ሰበ ስልጣን መንግስቲ ብወገኑ ነቲ መልእኽቲ ከብጽሕሉ ብምምጸኦም ብምምስጋን: ኤርትራውያን ኣብ ዓባይ ብሪጣንያ ብፍላይ ከኣ ኣብ ከተማ ሎንዶን: ኣብ ፖለቲካውን ቁጠባዊ ምዕባለ ናይ'ታ ሃገር ንዘለዎም ተራ ድሕሪ ምንኣዱ: ኣብ'ዚ ቀረባ ዓመት ንዘጋጥም ዘሎ ዘይ-ኤርትራዊ ባህልታት ኣብ'ዚ ኸተማ ምኽሳቶም ከም ዘተሓሳሰቦ ብምግላጽ: ነዚ ጉዳይ ንምፍትሑ ምስ ማሕበረ-ሰብ ኤርትራውያን ኮይኑ ነቲ ጸገም ንምፍትሑ መንግስቲ ምስ ኤርትራዊ ማሕበረ-ሰብ ብሓባር ክሰርሕ ምዃኑ ብምንጻር: ነቲ ኤርትራዊ ክብርታትን ዲስፕሊንን ከም ዘኽብርን ከም ዘድንቕን ብምግላጽ: ኣብ'ቲ ዘጋጠመ ኩነታት ናይ ገዛእ ርእሶም እኹል ትዕዝብትታ ከም ዘትረፉ ብምግላጽ: ነቲ ኩነታት ነባሪ ፍታሕ ንምምጻእ ብሓባር ክሰርሑ ምዃኖም ኣስሚሩሉ::

ጎኒ ጎኒ እዚ ክከይድ ዝጸንሐ መስርሕ ምብጻሕ ሰነዳዊ መልእኽቲ ኸኣ: ሰልፈኛታት ነቲ ኣብ'ቲ ከባቢ ብእግሩ ብመካይን: ብብሽክለታ: ኣውቶብስ ዝንቀሳቐስ ዝነበረ ህዝቢ: ዕላማን መደብን ምኽንያትን ናይ'ቲ ዝካየድ ዝነበረ ሰላማዊ ሰልፊ ግንዛቤ ንምሕዳር: ናብ ህዝቢ በራሪ ወረቐት ብብዝሒ ክዕደል ዊዒሉ:: እዚ ከም'ዚ ኢሉ እንከሎ ነዚ ኣብ በብእዋኑ ኣብ ልዕሊ ኤርትራውያን ሃገራውያን ክፍጸም ዝጸንሐ ናይ ምፍርራሕን ምጽባእን: ናይ ሓይሊ ስጉምቲ ዝምልከቶ ኮሚቴ ሓይሊ ዕማም ቆይሙ: ነቲ ጉዳይ ኣዳቒቑ ብምጽራይ ምስናይ እኹል ኩለንትናዊ መርትዖኡ ብሕጋዊ ገበናዊ ዓንቀጻት ብምምዝጋብ: ነቲ ዘጋጠመ ኣሉታዊ ኽስተት ብሕጋውያን ጠበቓታት ኣቢሉ ብግቡእ መስርሑ ብምሓዝ: እቲ ዝቐረበ ክሲ ብቤት-ፍርዲ መስርሑ ክዛዘም ብማለት: ብሕጋዊ መንገዲ ከም ዝሓዞ ኣብቲ ኣጋጣሚ ተሓቢሩ::

ብተመሳሳሊ ናብ ኩሎም ዝምልከቶም ኣካላት መንግስትን ፍርዳውን ፖሊሳውን ኣካላት ብኽታም ዝተረጋገጸ ናይ ፌርማ ፔትሽን: ናይ 10 ሽሕ ብኣካል ዝተረጋገጸ ሰነድ: ናብ ዝምልከቶም ኩሎም ኣብ ኢዶም ክወሃብ እንከሎ: ብኤለትሮኒካዊ መሳርሒ ዝተገብረ ምትእክኻብ ፌርማ ኸኣ ክሳብ ሕጂ:- ልዕሊ 25 ሽሕ ኣብ ኤለትሮኒካዊ መስመር (ኦን-ላይን) ናብ ዋና ጸሓፊ ውድብ ሕቡራት ሃገራት ኣንቶንዮ ጉተረስ ተላኢኹ::

ኣብ ሰልፈኛታት ስጡም ሃገራዊ ወኒ ዝተላበሰን: ሃገር! ሃገር! ዝሽትት ወንን ጽንዓትን ክረእ እንከሎ: ብምትሕሓዝ ነቲ ዘጋጠመ ናይ ጎንጽን ዓሎቕን ዊዲት ወጻእተኛታት ሰዓብቶም መጋበርያ ዕሱባትን ዘነደሮም ሰልፈኛታት: ብዓውታን ብነድርን ብዝኾነ ብራርያ ሓይሊ ኣይኮነን: ዋላ በቶም ኣያታት ኮይኖም ዝልእኽዎም ዘለዉ ዓሰብቶም 'ውን ከም ዘይምብርከኹ ብምንጻር: ብዓውታ ''ኣይንምብርከኽን ኢድና 'ውን ኣይንህብን!!!'' ''ጽምብላትና መለለዩ ሃገራዊ ክብርታትና!!!'' ብማለት ካብ ጻት ንጻት ዓባይ ብሪጣንያ ብፍላይ ከኣ ቀጽሪ ዳውኒንግ ስትሪት ቀዳማይ ሚኒስተር ዓባይ ብሪጣንያ ሪሺ ሱናክ ብዓውታ እንዳጨርሑ: ''ዓወትና ከም ወትሩ ብመትከላዊ መርገጽና!!!'' ከም ''ወትሩ ዓወት ንሓፋሽ!!!'' ብማለት ንዘካየድዎ ሰላማዊ ሰልፊ ብዝክረ ሰማእታት ዛዚሞም::

ሪፖተር ሳሕል ፕረስ!!!

ዘርኣይ ሰሎሞን:-

ሎንዶን !