ሲቪል ኣቭየሽን ኤርትራ ኣብዚ መግለጺኡ፡ “መገዲ ኣየር ኢትዮጵያ ጕድለታቱ ኪእርምን ንግዳያት ካሕሳ ኪኸፍልን፡ ብወገን በዓል መዚ ሲቭል ኣቭየሽን ዝቐረበሉ ሕቶ ዕሽሽ” ምባሉ ጠቒሱ፡ እቲ መንገዲ ኣየር ካብ 30 መስከረም 2024 ጀሚሩ ካብን ናብን ኤርትራ ከካይዶ ዝጸንሐ በረረታት ከቋርጽ ተወሲኑ ከምዘሎ ብምሕባር፡ ኵሎም ገያሾ መንገዲ ኣየር ኢትዮጵያ ጕዕዞኦም ከይሰናኸል ብእዋኑ ኣማሪጺታት ከናድዩ ተላብዩ።

ብዙሓት ተጓዓዝቲ እዚ መንገዲ ኣየር፡ ዋጋ እቲ መንገዲ ኣየር ካብ ንቡር ንላዕሊ ዝተጋነነ ከምዝዀነ ብምሕባር መረረኦም ክገልጹ ጸኒሖም’ዮም።

እቲ መንገዲ ኣየር ኣብ 2018 ክጅምር እንከሎ ንኣብነት ካብን ናብን ኣስመራ ናይሮቢ 400 ዶላር ዘኽፍል ዝነበረ ኣብዚ እዋን ልዕሊ 1300 ዶላር ከምዝደየበ ዝፍለጥ ኰይኑ፡ ኣብ ካልኦት መስመራት እውን ብዝተመሳሳሊ እቲ ዋጋ ኣመና ከቢድ ከምዝዀነ ክንገር ጸኒሑ እዩ።

ብዘይካ'ዚ፡ ቅድሚ ሕጂ እቲ ካብ ኣዲስ ኣበባ ናብ ኣስመራ ዝግበር ጕዕዞ ሓደ ሰዓትን 40 ደቒቕን ዝወስድ ኰይኑ፡ ዋጋ ትኬት ኣስታት ሓደ ሽሕ ዶላር በጺሑ ዝብል መረረታት ክስማዕ ጸኒሑ ነይሩ።

ብፍላይ ቅድሚ ለበዳ ኮሮናቫይረስ ዝነበረ ዋጋ ብምጥቃስ፡ ተጓዓዝቲ "እቲ ሕጂ ዘሎ ዋጋታት ኣመና ተጋኒኑ’ዩ" ክብሉ ጽኒሖም እዮም።

መገዲ ኣየር ኢትዮጵያ ነዚ ኣመልኪቱ ኣብ ዝሃቦ ምላሽ ድሕሪ እቲ ለበዳ ኣብ ዋጋ ትኬት ወሰኽ ከም ዝተራእየ ሓቢሩ።

ይዅን’ምበር፡ ቅድሚ ለበዳ ኮሮናቫይረስ ዝነበረ ዋጋ ትኬትን ሕጂ ዘሎን ብዙሕ ፍልልይ የብሉን ዝበለ ኰይኑ፡ ኣብቲ ግዜ ንሓደ በረራ 279 ዶላር ከም ዝነበረ ኣዘኻኺሩ ነይሩ።

እቲ መገዲ ኣየር፡ ንልዕሊ 75 ዓመታት ንኣፍሪቃውያን ናብ ሓደ ንምምጻእ ጻዕሪ ክገብር ከም ዝጸንሐ ብምግላጽ “ንኣፍሪቃውያን ወገናትና ንምብዝባዝ ዕላማ የብልናን” ኢሉ እዩ።

መገዲ ኣየር ኢትዮጵያ ናብ ኤርትራ፡ እንትርፎ እቲ ሓሓለፉ ኣብ ቀዳመ ሰንበት ከቋርጾ ዝጸንሐ በረረታት፡ መዓልታዊ በረራታት ካብን ናብን ኣስመራ ከካይድ ጸኒሑ’ዩ።

ናብ ኤርትራ ብዘይካ መንገዲ ኣየር ኢትየጵያ፡ መንገዲታት ኣየር ግብጺ፡ ቱርኪ፡ ዱባይን በረራታት የካይዳ’የን።

ኣብ ዝሓለፈ ቀረባ መዓልታት ኣብ መንጐ ኤርትራን ኢጣልያን ብዝተበጽሐ ስምምዕ መንገዲ ኣየር ኢጣልያ ናብ ኣስመራ በረራ ክትጅምር ምዃና ተገሊጹ ነይሩ’ዩ።