ዝተመሓየሸ ቅድሚ 4 ሰዓታት

ናብ ንግስነት ስዑዲ ዓረብ ወግዓዊ ምብጻሕ ንምግባር ሎሚ ካብ ኣስመራ ዝተበገሰ ፕረዚደንት ኢሳይያስ ኣፈወርቂ ናብ ርእሰከተማ ሪያድ ኣትዩ።

ኣብ ማዕርፎ ነፈርቲ ሪያድ ኣብ ዝኣተወሉ ምክትል ኣሚር ዞባ ሪያድ ዝኾነ ልኡል መሓመድ ቢን ዓብዱልራሕማን ቢን ዓብዱልዓዚዝ ኣል-ሳዑድ ከምዝተቐበሎ መንግስታዊ ማዕከናት ዜና ስዑዲ ሓቢረን።

እቲ ፕረዚደንት ብዕድመ ንጉስ ሰልማን ቢን ዓብዱልዓዚዝ ኣል ስዑድ፡ ናይ ኣርባዕተ መዓልታት ናይ ስራሕ ምብጻሕ ንምፍጻም ናብታ ንግስነት ከምዝገሸ ሚኒስተር ዜና ኤርትራ ገሊጹ ነይሩ።

እቲ ሚኒስተር ጉዳያት ወጻኢ ዑስማን ሳልሕ ዝርከቦ ላዕለዋይ ልኡኽ ኤርትራ ኣብዚ ናይ ስዑዲ ዓረብ ጻንሒቱ፡ ምስ ላዕለዎት ሰብ-መዚ መንግስቲ ስዑዲ ብምርኻብ፡ ኣብ ምሕያል ክልተኣዊ ዝምድናታትን ሽርክነትን፡ ከምኡ'ውን ኣብ ዞባዊን ኣህጉራዊን ጉዳያት ናይ ሓባር ረብሓ ዘተኰረ ዘተ ከካይዱ መደብ ተታሒዙ ከም ዘሎ ሚኒስተር የማነ ገብረመስቀል ብኤክስ ኣብ ዝሃቦ ሓበሬታ ጠቒሱ።

ፕረዚደንት ኢሳይያስ ኣብ ቀርኒ ኣፍሪቃ ሓያል ናይ ኩናት ወጥሪ ሰፊኑሉ ኣብ ዘሎ እዋን እዩ ናብ ስዑዲ ዓረብ ዝገይሽ ዘሎ።

ስዑዲ ዓረብ ኣብ ዞባ ቀይሕ ባሕሪ ምርግጋእ ኣብ ምርግጋጽ ሓያል ቁጠባውን ጸጥታውን ረብሓታት ከምዘለዋን፡ ነቲ እናዓበየ ዝኸይድ ዘሎ ጽልዋ ናይቲ ዞባዊት መወዳድርታ ሕቡራት ኢማራት ዓረብ ንምምካት ትጽዕር ከምዘላ ተንተንቲ ይሕብሩ።

ኣብ ስግር ቀርኒ ኣፍሪቃ፡ ኲናት ሓድሕድ ሱዳን፡ ውሽጣዊ ዘይምርግጋእ ኢትዮጵያ፡ ኣብ መንጎ ኣስመራን ኣዲስ ኣበባን ዘሎ ወጥሪ፡ ኣብ ሶማልያ ዝቕጽል ዘሎ ዘይምርግጋእ፡ ከምኡ'ውን ኣብ መንጎ ርያድን ኣቡዳቢን ዝካየድ ዘሎ ውድድር ነቲ ዞባ ናብ ቀጻሊ ቅልውላውን ስግኣትን ሸሚምዎ ከምዘሎ ይግለጽ።

ዝሓለፈ ሰሙን'ውን ፕረዚደንት ኢሳይያስ ኣፈወርቂ፡ ኣቦ መንበር ልኡላዊ ቤት ምኽሪ ሱዳን ጀነራል ዓብደልፋታሕ ኣልቡርሃን ብዝገበረሉ ዕድመ መሰረት ስራሕ ዑደት ንምፍጻም ናብ ፖርት ሱዳን ኣትዩ ነይሩ።