በዓልመዚ ሲቪል ኣቭየሽን ኤርትራ፡ መንገዲ ኣየር ኢትዮጵያ ካብ 30 መስከረም ጀሚራ ናብ ኣስመራ እትገብሮ በረራታት ደው ከተብል ምዃን ኣፍሊጡ። እቲ በዓልመዚ ኣብ ዝዘርግሖ ህዝባዊ ምልክታ፡ ነቲ ስጕምቲ ንምውሳድ ዝደረኸ ምኽንያት ዘይቅቡል ዝበሎ ክብሪ ዋጋታት፡ ምድንጓያት፡ ስርቂ ንብረትን ካልእ ምጕስቓል ተጓዓዝቲን ምዃኑ ይጠቅስ።

ካብ 30 መስከረም እቲ ስሩዕ በረራታት ከቋርጽ ምዃኑ ዝገለጸ እቲ ሓበሬታ ንተጓዓዝቲ ካልእ ኣማራጺታት ከናድዩ ጸዊዑ ኣሎ።

መንገዲ ኣየር ኢትዮጵያ ብወገኑ ካብ ሲቪል ኣቭየሽን ኤርትራ ንምቁራጽ በረራ መንገዲ ኣየር ኢትዮጵያ ናብ ኣስመራ ዝምልከት ደብዳበ ብ21 ሓምለ 2024 ከምዝበጽሖ ገሊጹ። እቲ ብማሕበራዊ መራኸቢ ኤክስ ዝወጸ መግለጺ መንገዲ ኣየር ኢትዮጵያ እቲ ንምቁራጽ በረራ መንገዲ ኣየር ኢትዮጵያ ብዝምልከት ዝበጽሖ ደብዳበ ናብዚ ውሳነ ዘብጽሐ ምኽንያት ከምዘይገልጽን ነቲ ጉዳይ ብቕልጡፍን ብሕውነትን ንምፍታሕ ከምኡ'ውን ካብ በዓል መዚ ሲቪል ኣቭየሽን ኤርትራ ተወሳኺ መብርሂ ንምርካብን ይሰርሕ ምህላው ሓቢሩ።

ድምጺ ኣመሪካ ካብ ክልተኡ ወገናት ኣብዚ ጉዳይ ተወሳኺ መብርሂ ንምርካብ ዝገበሮ ጻዕሪ ዛጊት ኣይተዓወተን።